चिंचवड: पिंपरी-चिंचवड महानगरपालिकेच्या निवडणुकीचे बिगुल वाजले असून, प्रभाग क्रमांक १९ मध्ये भारतीय जनता पक्षाने अत्यंत आक्रमक आणि भक्तीमय वातावरणात आपल्या निवडणूक मोहिमेचा अधिकृत शुभारंभ केला आहे. भाजपचे अधिकृत उमेदवार शीतल उर्फ विजय शिंदे यांनी आपल्या संपूर्ण पॅनेलसह चिंचवडकरांचे श्रद्धास्थान असलेल्या श्री स्वामी समर्थ मठात महाआरती करून विजयाचा संकल्प करून प्रचाराचा नारळ फोडला.
सायंकाळी शीतल उर्फ विजय शिंदे आणि त्यांच्या पॅनेलच्या सहकाऱ्यांनी स्वामींच्या चरणी श्रीफळ अर्पण करून विजयासाठी साकडे घातले. यावेळी “अक्कलकोट स्वामी समर्थ महाराज की जय”, “जय श्रीराम” आणि “भारतीय जनता पक्षाचा विजय असो” अशा घोषणांनी संपूर्ण मठ परिसर दुमदुमून गेला होता. याप्रसंगी स्वामी भक्त, पक्षाचे ज्येष्ठ मार्गदर्शक, स्थानिक पदाधिकारी आणि शेकडो कार्यकर्ते मोठ्या संख्येने उपस्थित होते.
आरतीनंतर पत्रकारांशी बोलताना शीतल उर्फ विजय शिंदे यांनी आपली भूमिका स्पष्ट केली. “प्रभागाचा सर्वांगीण विकास करणे हेच आमचे मुख्य ध्येय आहे. गेल्या पाच वर्षांत भाजपने प्रभागामध्ये रस्ते, पाणी, आरोग्य आणि स्वच्छतेची अनेक कामे मार्गी लावली आहेत. शहराच्या विकासाचा वारसा कायम ठेवण्यासाठी आमचे संपूर्ण पॅनेल कटिबद्ध आहे,” असा विश्वास त्यांनी व्यक्त केला. यावेळी उमेदवारांच्या कामाची ‘रिपोर्ट कार्ड्स’ देखील डिजिटल माध्यमातून मतदारांपर्यंत पोहोचवण्यात आली.
मठातील दर्शनानंतर शीतल उर्फ विजय शिंदे आणि पॅनेलच्या उमेदवारांनी मंदिर परिसर आणि लगतच्या सोसायट्यांमध्ये भव्य पदयात्रा काढली. ‘घरोघरी भाजप, घराघरांत भाजप’ हा संदेश घेऊन कार्यकर्त्यांच्या फौजा मैदानात उतरल्या आहेत. ठिकठिकाणी महिलांनी उमेदवारांचे औक्षण करून आणि पुष्पहार घालून स्वागत केले, तर ज्येष्ठ नागरिकांनी विजयासाठी आशीर्वाद दिले. या पदयात्रेमध्ये महिला बचत गटांच्या प्रतिनिधी आणि तरुणांचा सहभाग लक्षणीय होता. प्रभाग १९ मध्ये भाजपने मोठ्या शक्तिप्रदर्शनासह प्रचारात मोठी आघाडी घेतली आहे. केंद्र आणि राज्यातील सत्ताधारी पक्षाने केलेली कामे आणि स्थानिक पातळीवर राबवलेले विकासाचे प्रकल्प मतदारांना आकर्षित करतील, अशी खात्री यावेळी व्यक्त करण्यात आली. स्वामी समर्थ मठापासून सुरू झालेली ही विजयाची दौड आता प्रभागातील प्रत्येक घरापर्यंत पोहोचवण्याचा निर्धार कार्यकर्त्यांनी केला आहे.