पिंपरी: पत्रकार रोहित खर्गे यांची पिंपरी चिंचवड पत्रकार संघ उपाध्यक्षपदी नुकतीच निवड झाली. यानिमित्त त्यांचा सन्मान शाल, तुकोबाराय यांची अभंगगाथा देऊन शहरातील महाराष्ट्र कामगार साहित्य परिषद, पद्मश्री नारायण सुर्वे साहित्य कला अकादमी, यशवंतराव चव्हाण प्रतिष्ठान, महाराष्ट्र राज्य औद्योगिक विकास परिषद, महाराष्ट्र साहित्य परिषद भोसरी शाखा, दिलासा संस्था, शब्दधन काव्यमंच या संस्थांच्या वतीने करण्यात आला. याप्रसंगी महाराष्ट्र कामगार साहित्य परिषदेचे अध्यक्ष पुरुषोत्तम सदाफुले, कामगारभूषण जयवंत भोसले, कामगारभूषण राजेंद्र वाघ उपस्थित होते.
पद्मश्री नारायण सुर्वे साहित्य कला अकादमीचे अध्यक्ष सुदाम भोरे यावेळी म्हणाले “आजची पत्रकारिता दिवसेंदिवस बदलत चालली आहे. सकारात्मक उर्जा निर्माण होईल असे सत्यप्रिय लेखन पत्रकारांनी आरसा म्हणून समाजापुढे ठामपणे मांडले पाहिजे. रोहित खर्गे यांनी उत्तम योगदान पत्रकार म्हणून दिले आहे. सत्यतेला इश समजून ‘सत्यमेव जयते’ ब्रिदाचे जागरण त्यांच्या हातून भविष्यात घडावे”.
दिलासा संस्थेचे अध्यक्ष सुरेश कंक यांनी कार्यक्रमाचे सुत्रसंचलन केले.