पिंपळे गुरव:- गुढीपाडव्याचा आनंद श्रमिक सफाई कामगारां समवेत द्विगुणित करीत दिलासा संस्थेच्या वतीने संस्थेचे अध्यक्ष सुरेश कंक यांनी सफाई कामगारांना प्रेमपूर्वक साखर गाठी देऊन गुढीपाडवा सण साजरा केला. पिंपळे गुरव काशीदनगर येथील सुर्यमुखी गणेश मंदिराच्या प्रांगणात सफाई कामगार नातू बापू शिंदे, सुरेखा बापू लोखंडे,सोनम अशोक लोखंडे, लता उशान लोखंडे, लक्ष्मी मुथीयाल शिंदे यांना संस्थेच्या वतीने गुढीपाडवा सणाच्या शुभेच्छा देण्यात आल्या.
यावेळी दिलासा संस्थेचे अध्यक्ष सुरेश कंक म्हणाले-प्रत्येकाच्या दारापुढील रस्ता हे सफाई कामगार नित्यनेमाने झाडतात. नववर्षाचा पहिला दिवस गुढीपाडवा सण गोड व्हावा अन सफाई कामगारांच्या प्रति कृतज्ञता व्यक्त करावी म्हणून हा उपक्रम करण्यात आला आहे. त्या कामगारांशी संवाद साधला असता त्यांना अजूनही पगार मिळाला नाही असे त्यांच्या मनोगतातून समजले. पिंपरी चिंचवड महापालिकेच्या कंत्राटदारांनी सणासुदीला सफाई कामगारांना वेळेवर वेतन दिले तर खऱ्या अर्थी अशा सेवाभावी कामगारांना सणाचा आनंद मिळेल असे मनोगत सुरेश कंक यांनी यावेळी व्यक्त केले.